Racing e Albacete loitarán en A Malata por tres desexados puntos
Os ferroláns confían en acadar a súa primeira vitoria do campionato.
O Racing Club Ferrol e o Albacete Balompié enfrontaranse esta tarde, a partir das 16.15 horas, en A Malata, nun encontro correspondente á sexta xornada da LALIGA Hypermotion. Unha confrontación na que a escadra anfitrioa busca alcanzar a súa primeira vitoria do campionato. Despois de tres empates -dous deles consecutivos-, os pupilos de Cristóbal Parralo aspiran a sumar tres puntos que melloren a súa situación na táboa e plasmen na clasificación as boas sensacións que, por momentos, deixaron nos últimos encontros.
Nas filas ferrolás, o técnico catalán contará coñecidas ausencias de Erick Cabaco, David Castro, Aitor Buñuel e Brais Martínez. Baixas que o preparador confía en paliar grazas a unha plantilla que, asegura, cada vez se achega máis ao nivel que espera dela.
No Albacete Balompié, Alberto González deberá prescindir dos lesionados Jaume Costa, Pacheco e Javi Villar.
Aínda é cedo para que a preocupación se instale en A Malata, o que non é óbice para que o coliseo ferrolán sexa, máis que nunca, unha panela a presión que catapulte ao seu equipo cara a un triunfo balsámico.
