Integral Motion multiplica o seu compromiso co Racing Club Ferrol

Integral Motion non só renovou esta tempada o seu compromiso co Racing Club Ferrol, senón que deu un paso adiante, multiplicando o seu respaldo para converterse nun dos nosos principais patrocinadores. Un apoio vital para a entidade que foi recoñecido durante a presentación da firma como patrocinador do partido que este domingo, ás 14.00 horas, disputaremos en A Malata ante o Real Oviedo. Esta acción, tal e como explicou o Director de Márketing do club, Daniel Agra, terá repercusión publicitaria en diversos activos dixitais e físicos e converterá a Integral Motion nun dos grandes protagonistas deste encontro.

Para o Racing Club Ferrol é de capital importancia este tipo de alianzas, máis cando se materializan con empresas estreitamente vinculadas á comarca e que, ademais, comparten os nosos valores. Precisamente nesa liña posicionábase Barbara Patiño, Directora de Márketing de Integral Motion, ao sinalar a resiliencia como unha das señas de identidade da súa firma, do Racing e da propia cidade de Ferrol. A empresa afronta a recta final deste ano cunha importante campaña de descontos e un amplo stock de vehículos.