O Racing di adeus á liga en Getafe cun sabor inmellorable.
O Racing Club Ferrol Genuine concluíu este fin de semana o seu concurso na LALIGA GENUINE coa disputa da última e cuarta xornada do campionato. O torneo que pechou a competición disputouse na Cidade Deportiva Fernando Santos da Parra, en Getafe, e reuniu a máis de mil persoas entre xogadores e xogadoras, membros dos corpos técnicos e voluntarios. Tampouco faltaron numerosos familiares, amigos e afeccionados, que converteron o evento nunha auténtica exaltación do fútbol. Un espectáculo que, ante todo, serviu para promover a inclusión a través do deporte.
FC Andorra, Real Madrid e RC Deportivo de La Coruña foron os adversarios da nosa formación nesta última etapa do campionato, na que volvemos ocupar un lugar destacado na clasificación do "fair play". Xogadores procedentes de Aspanaes, Aspaneps, Souto de Leixa e Virxe de Chamorro, centros cos que colaboramos habitualmente, compuxeron a delegación departamental, dirixida polos técnicos Iván Pita, Diego Garrido e Fernando Quiroga.
Para a nosa entidade, desenvolver un proxecto de fútbol inclusivo a través da Fundación Racing Club de Ferrol converteuse nunha das pezas angulares da folla de ruta que nos guía como club. Unha sección que gaña consistencia cada tempada e que nos permite aportar unha proposta de valor á cidade e á súa comarca.
O TORNEO
Durante o fin de semana, os 46 equipos participantes dirimiron 69 encontros presididos polo lema desta liga Genuine: "Compartir é máis importante que competir".
As estrelas da LALIGA GENUINE gozaron do desfile de despedida antes da entrega de medallas e trofeos aos equipos gañadores. Clemente Villaverde, presidente da FUNDACIÓN LALIGA e Ángel Torres, presidente do Getafe CF, foron os encargados de presidir a cerimonia, acompañados de Jorge de la Vega, director xeral executivo de LALIGA; Sara Hernández, alcaldesa de Getafe, así como de outros representantes institucionais do Getafe CF, de LALIGA e da súa Fundación, e das marcas asociadas da competición.
Ao longo da tempada, LALIGA GENUINE contou co inestimable apoio das marcas asociadas que acompañan o proxecto: EA Sports, Puma, Panini, El Corte Inglés, Allianz, Burger King, Solán de Cabras e PortAventura World.